|
Xa hai data para o Foro Social Mundial 2009 |
|
O Consello Internacional –CI– do Foro Social Mundial reuniuse en Abuja (Nixeria) entre o 30 de marzo e 3 de abril e confirmou a data exacta de realización do vindeiro FSM 2009 en Belém do Pará, no Brasil. O evento acontecerá do 27 de xaneiro ao 1 de febreiro do ano 2009.
O territorio deste FSM 2009 estará en principio constituído pola Universidade Federal do Pará, a Universidade Federal Rural da Amazônia e moi posibelmente o Núcleo Pedagógico Integrado. Por outra banda, até o 6 de xuño poderanse enviar propostas á consulta convocada polo CI para identificar obxectivos de acción que potencien o diálogo e a construción de alianzas entre as diversas organizacións, movementos e redes da Pan-Amazonia e do mundo. A proposta é que, como aconteceu en Nairobi 2007, as actividades do FSM se enmarquen dentro deses obxectivos de acción. As respostas poden enviarse ao xa inaugurado espazo virtual do FSM 2009, que coma sempre lles servirá aos movementos e redes como vehículo para artellar actividades na vindeira edición do Foro Social Mundial. |
Carta de principios 
